Google: 10ఏళ్ల తర్వాత మారిన గూగుల్ లోగో.. మార్పు వెనుక అసలు కథ ఇదే!
Google ఇంతకు ముందున్న 'G' ఐకాన్‌లో ఎరుపు, నీలం, ఆకుపచ్చ మరియు పసుపు రంగులకు చెందిన నాలుగు వేర్వేరు బ్లాక్‌లు ఉండేవి. కొత్త లోగోలో కూడా ఈ నాలుగు రంగులే ఉన్నాయి, కానీ ఇప్పుడు మీకు బ్లాక్‌లు కనిపించవు.
- Edited By: NARESH ENNAM,
- Updated on May 13, 2025 / 04:08 PM
Google: ప్రపంచంలోనే అతిపెద్ద టెక్ కంపెనీ అయిన గూగుల్ గత పది సంవత్సరాలలో మొదటిసారిగా తన లోగోను రీఫ్రెష్ చేసింది. దాదాపు ఒక దశాబ్దం తర్వాత కంపెనీ లోగోను మార్చడంతో, ఇకపై గూగుల్ లోగో కొత్త రంగుల్లో కనిపించనుంది. ముఖ్యంగా ‘G’ ఐకాన్ ఇప్పుడు మరింత రంగులమయంగా మారింది. గూగుల్ ఈ సరికొత్త లోగో iOS, Android బీటా వెర్షన్ 16.8లో కనిపిస్తోంది.
ఇంతకు ముందున్న ‘G’ ఐకాన్‌లో ఎరుపు, నీలం, ఆకుపచ్చ మరియు పసుపు రంగులకు చెందిన నాలుగు వేర్వేరు బ్లాక్‌లు ఉండేవి. కొత్త లోగోలో కూడా ఈ నాలుగు రంగులే ఉన్నాయి, కానీ ఇప్పుడు మీకు బ్లాక్‌లు కనిపించవు. దీనితో పాటు, కొత్త లోగో గ్రేడియంట్ డిజైన్‌లో మరియు మరింత డైనమిక్ లుక్‌లో కనిపిస్తుంది.
‘G’ లోగో మార్పుకు కారణం ఇదేనా?
గూగుల్ తన లోగోను మార్చడానికి గల అసలు కారణం స్పష్టంగా తెలియకపోయినప్పటికీ, కంపెనీ కృత్రిమ మేధస్సు (AI)పై మరింతగా దృష్టి సారిస్తోందనే సంకేతాలు మాత్రం అందుతున్నాయి. మీడియా నివేదికల ప్రకారం.. జీమెయిల్, గూగుల్ మ్యాప్స్ వంటి గూగుల్ ఇతర సర్వీస్‌లలో ప్రస్తుతానికి కొత్త ‘G’ ఐకాన్ కనిపించడం లేదు.
గూగుల్ నుంచి కొత్త అప్‌డేట్ గురించి ఎటువంటి అధికారిక సమాచారం వెలువడలేదు. ఈ మార్పు మే 20న జరగబోయే గూగుల్ I/O 2025 ఈవెంట్‌కు సరిగ్గా ముందు రావడం గమనార్హం. ఈ ఈవెంట్‌లో కంపెనీ తమ కొత్త లోగో గురించి మరిన్ని వివరాలను వెల్లడించే అవకాశం ఉంది.
9టూ5గూగుల్ నివేదిక ప్రకారం.. ఆపిల్ యూజర్లు గూగుల్ సెర్చ్ యాప్ ద్వారా కొత్త లోగోను చూడడం ప్రారంభించారు. అయితే, ప్రస్తుతం ఆండ్రాయిడ్ బీటా వెర్షన్ 16.8లో మాత్రమే ఈ కొత్త లోగో కనిపించింది. కొత్త లోగో పిక్సెల్ స్మార్ట్‌ఫోన్‌లు, కొన్ని ఎంపిక చేసిన iOS పరికరాల్లో మాత్రమే కనిపించవచ్చు. అయితే, పాత నాన్-పిక్సెల్ ఆండ్రాయిడ్ స్మార్ట్‌ఫోన్‌లు, వెబ్‌లో మాత్రం పాత ‘G’ లోగోనే కనిపిస్తుంది.
