Pacific Ocean: పసిఫిక్‌ మహాసముద్రంలో అద్భుతం.. సైంటిస్టులకు కూడా అంతుచిక్కని రహస్యం!
- Edited By: NARESH ENNAM,
- Updated on March 21, 2025 / 01:59 PM
Pacific Ocean: సముద్రం అనగానే మనకు గుర్తుకు వచ్చేది నీలిరంగు.. అందులోని జలచరాలు.. బీచ్‌లు.. చేపలు పట్టే జాలర్లు.. ఇంకా ఆలోచిస్తే తుఫాన్లు, సైక్లోన్లు, సునామీలు. పౌర్ణమి అమావాస్య రోజు పోటెత్తే అలలు. సముద్రంలో మునిగిపోయిన షిప్‌లు.. అందులోని విలువైన వసుత్వులు. కానీ, పసిఫిక్‌ మహాసముద్రంలో కనిపించిన ఓ దృష్యాన్ని చూసి శాస్త్రవేత్తలు కూడా షాక్‌ అయ్యారు.
పసిఫిక్‌ మహాసముద్రంలో 2022లో ‘యెల్లో బ్రిక్‌ రోడ్‌‘ (Yellow Brick Road)ను గుర్తించారు. ఇది హవాయి దీవులకు ఉత్తరంగా ఉన్న లిలియుఒకలాని రిడ్జ్‌ (Liliʻuokalani Ridge) వద్ద పపహానౌమోకుఆకీ మెరైన్‌ నేషనల్‌ మాన్యుమెంట్‌ (Papahanaumokuakea Marine National Monument) ప్రాంతంలో ఎక్స్‌ప్లోరేషన్‌ వెసెల్‌ నాటిలస్‌ (Exploration Vessel Nautilus) అనే పరిశోధనా నౌక సిబ్బంది గుర్తించారు. ఈ ప్రాంతం సముద్ర గర్భంలో 3 వేల మీటర్ల కంటే ఎక్కువ లోతులో ఉంది.
మానవ నిర్మితం కాదు…
ఈ ‘రోడ్డు‘ నిజానికి మానవ నిర్మితమైనది కాదు, అది ఒక సహజ భౌగోళిక నిర్మాణం. పరిశోధకులు దీన్ని ‘యెల్లో బ్రిక్‌ రోడ్‌‘ అని పిలిచారు, ఎందుకంటే ఇది ‘విజార్డ్‌ ఆఫ్‌ ఓజ్‌‘ కథలోని పసుపు రాతి రహదారిని పోలి ఉంటుంది. వాస్తవానికి, ఇది హైలోక్లాస్టైట్‌ (hyaloclastite) అనే అగ్నిపర్వత శిల, ఇది అధిక శక్తితో కూడిన అగ్నిపర్వత విస్ఫోటనాల సమయంలో ఏర్పడుతుంది. ఈ శిలలు సముద్ర గర్భంలో అనేక శకలాలుగా చేరి, ఉష్ణోగ్రతలో మార్పుల వల్ల (గర్మించడం మరియు చల్లబడడం) 90–డిగ్రీల కోణాల్లో విరిగి, రాతి పలకల వలె కనిపిస్తాయి.
పరిశోధకులు దీన్ని ‘రోడ్‌ టు అట్లాంటిస్‌‘ అని సరదాగా పిలిచినప్పటికీ, ఇది ఒక పురాణ నగరానికి దారి తీసే రహదారి కాదని, ప్రకృతి సృష్టించిన అద్భుతమని వివరించారు. ఈ కనుగొన్న ప్రదేశం నూట్కా సీమౌంట్‌ (Nootka Seamount) శిఖరంపై ఉంది, ఇది సముద్రంలోని ఒక అగ్నిపర్వత పర్వతం. ఈ ఆవిష్కరణ సముద్ర గర్భంలోని భౌగోళిక ప్రక్రియలను అర్థం చేసుకోవడంలో పరిశోధకులకు సహాయపడింది.
