Vi BSNL : 20 కోట్ల మంది కస్టమర్లకు భారీ షాక్.. ఒక్కటి కాబోతున్న వోడాఫోన్-బీఎస్ఎన్ఎల్

Vi BSNL : దేశంలోని మూడవ అతిపెద్ద టెలికాం సంస్థ వోడాఫోన్-ఐడియా (Vi)కు సుప్రీంకోర్టులో భారీ ఎదురుదెబ్బ తగిలింది. 5 బిలియన్ డాలర్లు (సుమారు రూ.41,000 కోట్లు) వడ్డీ, జరిమానాలను మాఫీ చేయాలని Vi చేసిన అభ్యర్థనను కోర్టు తోసిపుచ్చింది. ఈ డిమాండ్‌ను ప్రభుత్వం ఇప్పటికే తిరస్కరించింది. ఇప్పుడు సుప్రీంకోర్టు నుంచి కూడా ఎలాంటి ఉపశమనం లభించకపోవడంతో కంపెనీ కష్టాలు మరింత పెరిగాయి. ఈ నేపథ్యంలో Vi మూతపడుతుందా.. లేక BSNLలో విలీనమవుతుందా? ప్రస్తుతం Viకు ఉన్న కోట్లాది మంది కస్టమర్లు ఇప్పుడు ఏం చేయాలి? ఇలాంటి అన్ని ప్రశ్నలకు సమాధానాలు ఈ వార్తలో తెలుసుకుందాం.

Viపై ఎంత అప్పు ఉంది?
టైమ్స్ ఆఫ్ ఇండియా నివేదిక ప్రకారం.. Viపై మొత్తం AGR (అడ్జస్టెడ్ గ్రాస్ రెవెన్యూ) సుమారు రూ.83,400 కోట్లు ఉంది. ఇందులో అసలు బకాయి రూ.12,797 కోట్లు కాగా, రూ.28,294 కోట్లు వడ్డీ రూపంలో ఉంది. అదనంగా, రూ.6,012 కోట్ల జరిమానా విధించారు. అంతేకాదు, రూ.11,151 కోట్ల జరిమానాపై కూడా వడ్డీ చెల్లించాల్సి ఉంది. కంపెనీ సీఈవో అక్షయ్ మూంద్రా మాట్లాడుతూ.. ఎలాంటి ఉపశమనం లభించకపోతే 2025-26 తర్వాత కంపెనీ సేవలను కొనసాగించడం కష్టమని తెలిపారు.

Read Also:Traffic Fines : రూ. 12,000 కోట్ల జరిమానాలు.. రూ. 9,000 కోట్లు బాకీ.. ట్రాఫిక్ రూల్స్ పాటించడమే లేదట

Vi BSNLలో విలీనమవుతుందా?
Viలో ఇప్పటికే 49 శాతం వాటా ప్రభుత్వానికి ఉంది. ఈ నేపథ్యంలో ప్రభుత్వం కోరుకుంటే మిగిలిన వాటాను కూడా కొనుగోలు చేసి, దీనిని పూర్తిగా ప్రభుత్వ సంస్థగా మార్చవచ్చు. ఈ లెక్కన ప్రభుత్వం Viను BSNLలో విలీనం చేసే అవకాశం ఉంది. దీనివల్ల BSNL నెట్‌వర్క్, కస్టమర్ బేస్ రెండూ పెరగవచ్చు. ఆ తర్వాత BSNL భారతదేశంలో మూడవ అతిపెద్ద టెలికాం సంస్థగా అవతరించవచ్చు.

Vi ప్రయాణం ఎల్లప్పుడూ మార్పులతో కూడుకుంది. మొదట ఇది Essar. ఆ తర్వాత Hutchison Essarగా మారింది. తరువాత కేవలం Hutchగా మారింది. ఈ పరంపర ఇక్కడితో ఆగలేదు. ఆ తర్వాత Vodafoneగా మారింది. జియో వచ్చిన తర్వాత Vodafone-Ideaగా మారింది. ఇప్పుడు ముందు ముందు ఏం జరుగుతుందో కాలమే నిర్ణయించాలి.

Read Also:Bhairavam Boycott : ట్రెండ్ అవుతున్న భైరవం బాయ్‌ కాట్.. ఎందుకోసమంటే?

ఒకవేళ Vi మూతపడితే?
ఒకవేళ Vi మూతపడితే దేశంలో రెండు పెద్ద ప్రైవేట్ టెలికాం కంపెనీలు మాత్రమే మిగులుతాయి – మొదటిది జియో, రెండవది ఎయిర్‌టెల్. దీనివల్ల మార్కెట్‌లో ఈ రెండు కంపెనీల ఆధిపత్యం పెరగవచ్చు. ఈ కంపెనీలు తమకు నచ్చిన విధంగా రేట్లను నిర్ణయిస్తాయి. ఇది కస్టమర్లపై ప్రభావం చూపవచ్చు. BSNL ఇంకా ఉన్నప్పటికీ దాని పట్టు అంత బలంగా లేదు. Vi ఎదుర్కొంటున్న సవాళ్లు చాలా ఉన్నాయి. కానీ ప్రభుత్వం, కంపెనీ కలిసి ఏదైనా పరిష్కారం కనుగొంటాయా లేదా అనేది చూడాలి. ప్రస్తుతానికి కస్టమర్లు కొద్దిగా వేచి ఉండడమే మంచిది.