Virus Alert : వైరస్ అలర్ట్.. చైనా గబ్బిలాల్లో 20 కొత్త వైరస్‌లు.. మానవాళికి మరో ముప్పు తప్పదా ?
- Edited By: rocky,
- Updated on June 27, 2025 / 01:27 PM
Virus Alert : చైనాలోని యున్నాన్ ప్రావిన్స్‌లో ఉన్న పండ్ల తోటల్లో శాస్త్రవేత్తలకు గబ్బిలాల నుంచి ఏకంగా 20 కొత్త వైరస్‌లు దొరికాయట. ఈ వైరస్‌లను గబ్బిలాల కిడ్నీల్లో గుర్తించారు. వీటిలో రెండు వైరస్‌లు అయితే చాలా ప్రమాదకరమైనవని, అవి గతంలో ఎంతో మంది ప్రాణాలు తీసిన నిపా వైరస్, హెంద్రా వైరస్ లాంటివే అని చెబుతున్నారు. యున్నాన్ ఇన్‌స్టిట్యూట్ ఆఫ్ ఎండెమిక్ డిసీజ్ కంట్రోల్ యూనివర్సిటీ, డాలీ యూనివర్సిటీ శాస్త్రవేత్తలు కలిసి 10 రకాల జాతులకు చెందిన 142 గబ్బిలాలను పరిశీలించారు. ఈ పరిశోధనలో గబ్బిలాల కిడ్నీల నుంచి ఈ 20 కొత్త వైరస్‌లతో పాటు, ఒక కొత్త బ్యాక్టీరియా, ఒక పరాన్నజీవి కూడా దొరికాయి. దొరికిన కొత్త వైరస్‌లలో నిపా, హెంద్రా వైరస్‌లకు చాలా దగ్గర సంబంధం కలిగి ఉన్నాయని శాస్త్రవేత్తలు అంటున్నారు.
శాస్త్రవేత్తలు చెబుతున్న దాని ప్రకారం.. చైనాలో గబ్బిలాల్లో హెనిపావైరస్ జీనోమ్‌లు దొరకడం ఇదే మొదటిసారి అని తెలుస్తోంది. ఈ కొత్త వైరస్‌లు గబ్బిలాల కిడ్నీల్లో ఉన్నాయంటే, అవి వాటి మూత్రం ద్వారా బయటకు వచ్చి పండ్లు, నీటిని కలుషితం చేస్తున్నాయి. అంటే, కలుషితమైన పండ్లను తింటే లేదా అలాంటి జ్యూస్‌లు తాగితే, ఆ వైరస్‌లు మనుషుల లేదా జంతువుల శరీరాల్లోకి ప్రవేశించే అవకాశం ఉంది. గబ్బిలాల మూత్రం లేదా మలంతో కలుషితమైన పండ్లు తిన్న లేదా నీళ్లు తాగిన జంతువులు, ఆ తర్వాత వాటి ద్వారా మనుషులకు కూడా ఈ వైరస్‌లు సోకే ప్రమాదం ఉంది. అంతేకాదు గబ్బిలాల మలం, మూత్రం, లాలాజలం లేదా రక్తాన్ని నేరుగా తాకిన వారికి కూడా ఈ వైరస్‌లు సోకవచ్చని శాస్త్రవేత్తలు హెచ్చరిస్తున్నారు.
Read Also:Coolie : రజనీకాంత్ ‘కూలి’ సినిమాకు టైటిట్ గోల.. మళ్లీ కొత్త పేరు.. ఇంతకీ ఏమైందంటే ?
ప్రస్తుతానికి ఈ కొత్త వైరస్‌ల వల్ల మనుషులకు ఎవరికీ ఇన్ఫెక్షన్ సోకినట్లు ఎలాంటి సమాచారం లేదని శాస్త్రవేత్తలు తెలిపారు. అయితే, ఈ వైరస్‌ల జన్యు నిర్మాణం నిపా లేదా హెంద్రా వైరస్‌లను పోలి ఉందని, గతంలో ఈ వైరస్‌ల వల్ల చాలా మంది చనిపోయారని గుర్తు చేస్తున్నారు. యున్నాన్‌లో దొరికిన ఈ గబ్బిలాలు సాధారణంగా మనుషులు నివసించే ప్రాంతాలకు లేదా పని చేసే చోట్లకు దగ్గరగా ఉండవు. కాబట్టి, వాటి నుంచి మనుషులకు నేరుగా ఇన్ఫెక్షన్ సోకే అవకాశం తక్కువేనని అంటున్నారు. కానీ, పండ్ల తోటల దగ్గర జంతువులు ఈ గబ్బిలాలకు దగ్గరై, ఆ తర్వాత ఆ జంతువుల నుంచి మనుషులకు వైరస్ సోకే ప్రమాదం ఉందని చెబుతున్నారు.
అడవులు నరికివేయడం వల్ల గబ్బిలాలు తరచుగా పండ్ల తోటల దగ్గరకు లేదా మనుషులు నివసించే ప్రాంతాలకు వస్తున్నాయని, దీనివల్ల ఇన్ఫెక్షన్ వ్యాప్తి చెందే ప్రమాదం పెరుగుతుందని నిపుణులు చెబుతున్నారు. పండ్లను కడగకుండా తినడం వల్ల లేదా కలుషితమైన నీరు తాగడం వల్ల వైరస్ సోకవచ్చు. కొన్ని గబ్బిలాలు పండ్లను కలుషితం చేయవచ్చు. బయటి పొలాల్లో పెంచే జంతువులు కూడా కలుషితమైన గబ్బిలాలతో సంబంధం పెట్టుకోవచ్చు. ఇలా జంతువులు వైరస్ వాహకాలుగా మారవచ్చు. ఈ వైరస్‌ల నుంచి రక్షించుకోవడానికి పండ్లు, కూరగాయలను తినే ముందు బాగా కడగాలి. బయట తెరిచి ఉంచిన లేదా ముందుగానే కోసిన పండ్లను తినకూడదు. గబ్బిలాల మలం లేదా మూత్రంతో కలుషితమైన నీరు లేదా పండ్లు, కూరగాయలు అస్సలు తినకూడదు. జంతువులకు కూడా శుభ్రమైన ఆహారం, నీరు ఇవ్వాలి, అవి ఇన్ఫెక్షన్ బారిన పడకుండా చూసుకోవాలి. పండ్ల తోటలు లేదా జంతువులను పెంచే ప్రాంతాల్లో గబ్బిలాలు రాకుండా చూడటానికి ప్రయత్నించాలి.
Read Also:Rashmika Mandanna: భయపెట్టిన నేషనల్ క్రష్ రష్మిక.. ఫ్యాన్స్ నెవర్ బిఫోర్ లుక్‌లో కొత్త ప్రాజెక్ట్!
