ISRO : అంతరిక్షంలో భారత్ మరో ముందడుగు.. మే 18న ఇస్రో 101వ ప్రయోగం.. ప్రత్యేకతలివే!
- Edited By: rocky,
- Updated on May 15, 2025 / 09:54 PM
ISRO : భారత అంతరిక్ష పరిశోధనా సంస్థ (ఇస్రో) మరో కీలక మైలురాయిని చేరుకోనుంది. మే 18న RISAT-18 అనే 101వ ఉపగ్రహాన్ని ప్రయోగించనుంది. ఇది భూమిని నిరంతరం పరిశీలించడం, నిఘా సామర్థ్యాలను మెరుగుపరచడంలో కీలక పాత్ర పోషిస్తుంది. ఈ ఉపగ్రహాన్ని పోలార్ శాటిలైట్ లాంచ్ వెహికల్ (PSLV-C61) ద్వారా శ్రీహరికోట నుంచి ప్రయోగించనున్నారు. ఇస్రో ఛైర్మన్ వి. నారాయణన్ గురువారం విలేకరుల సమావేశంలో మాట్లాడుతూ.. “మేము జనవరిలో శ్రీహరికోట నుంచి మా 100వ రాకెట్‌ను విజయవంతంగా ప్రయోగించాం. ఇప్పుడు మే 18న భారతదేశం 101వ ఉపగ్రహం RISAT-18 ఎర్త్ అబ్జర్వేషన్ ఉపగ్రహంగా ప్రయోగించనున్నాం” అని తెలిపారు.
ఈ ఉపగ్రహం భారతదేశం నిఘా, రిమోట్ సెన్సింగ్, విపత్తు స్పందన సామర్థ్యాలను మరింత బలోపేతం చేయడాన్ని లక్ష్యంగా పెట్టుకుంది. ఇది దేశ భద్రత, సంరక్షణకు సాయపడుతుంది. నారాయణన్ మాట్లాడుతూ.. ఇస్రో అన్ని మిషన్లు భారతదేశ భద్రత, జాతీయ అవసరాల ఆధారంగానే ప్లాన్ చేస్తామని స్పష్టం చేశారు. భారత సాయుధ దళాల కోసం ప్రత్యేక ప్రయోగాల గురించి అడిగినప్పుడు ఆ కార్యక్రమాలన్నీ దేశ ప్రజల భద్రత కోసమే అని స్పష్టం చేశారు.
Read Also :Bharat 6G 2025 : టెలికాం రంగంలో విప్లవం.. 5G కంటే 100 రెట్లు వేగంతో ఇంటర్నెట్!
1979లో ఇస్రో ప్రస్థానం ప్రారంభం
నారాయణన్ ఇస్రో ప్రారంభ రోజులను గుర్తు చేసుకున్నారు. భారతదేశం 1979లో SLV-3 రాకెట్ ద్వారా తన అంతరిక్ష ప్రయాణాన్ని ప్రారంభించింది. ఇందులో 98 శాతం విజయం సాధించింది. మొదటి మిషన్ విజయవంతంగా 1980లో జరిగింది. అప్పటి నుంచి సాంకేతిక సామర్థ్యాలను నిరంతరం బలోపేతం చేసుకుంటూ వస్తుంది ఇస్రో. ఇస్రో ఇప్పుడు రక్షణ, విపత్తు నిర్వహణ, వ్యవసాయం, వాతావరణ పర్యవేక్షణ వంటి కీలక రంగాల్లో భారతదేశ ప్రయోజనాల నిమిత్తం సేవ చేసేందుకు ఇస్రో కట్టుబడి ఉంది.
ఇస్రో తదుపరి మిషన్ EOS-09 (RISAT-1B)
ఇస్రో తదుపరి మిషన్ EOS-09 (RISAT-1B)ను కూడా ప్రకటించింది. ఇది జూన్ 18, 2025న శ్రీహరికోట నుంచి ప్రయోగించనుంది. ఈ ఉపగ్రహం భారతదేశం భూ పరిశీలన కార్యక్రమంలో మరొక ముఖ్యమైన అడుగు కాబోతుంది. ఇస్రో అంతరిక్ష మిషన్లు ఇప్పుడు జాతీయ భద్రత, నిఘా, విపత్తు నిర్వహణలో కీలక పాత్ర పోషిస్తున్నాయి. ఇది దేశం సాంకేతిక, వ్యూహాత్మక శక్తిని మరింత పెంచుతోంది.
Read Also :Social Media : వర్చువల్ ప్రపంచం.. వెలివేసిన బంధాలు.. సోషల్ మీడియా తెచ్చే ఒంటరితనం ఎలా ఉంటుందంటే ?
