Mobile Data : ఇంటర్నెట్ వాడకంలో ఇండియా టాప్.. నెలకు ఒక వ్యక్తి ఎంత డేటా వాడుతున్నాడో తెలుసా?

Mobile Data : ఈ రోజుల్లో ఎక్కడ చూసినా స్మార్ట్ ఫోన్లు వాడుతూనే కనిపిస్తున్నారు. అయితే, భారతదేశంలో ఒక మనిషి సగటున నెలకు ఎంత ఇంటర్నెట్ డేటా వాడుతున్నారో తెలుసా ? ఇటీవల విడుదలైన ఎరిక్సన్ మొబిలిటీ 2025 నివేదిక ప్రకారం.. మొబైల్ డేటా వినియోగం విషయంలో భారతదేశం ప్రపంచంలోనే అగ్రస్థానంలో ఉందని తేలింది. భారతదేశంలో సగటున ఒక స్మార్ట్‌ఫోన్ యూజర్ ప్రతి నెలా 32GB డేటాను వాడుతున్నాడు. ఈ సంఖ్య రాబోయే ఐదేళ్ళలో అంటే 2030 నాటికి రెట్టింపు అవుతుందని అంచనా వేస్తున్నారు. గత నవంబర్‌లో వచ్చిన నివేదికలో 2030 నాటికి ఒక యూజర్ నెలవారీ డేటా వినియోగం 66GBకి పెరుగుతుందని అంచనా వేశారు. కానీ, ఈ తాజా నివేదికలో ఆ అంచనాను 4 శాతం తగ్గించి 62GBకి కుదించారు.

ఈ నివేదికలో 2030 నాటికి భారతదేశంలో 5G సబ్‌స్క్రైబర్ల సంఖ్య భారీగా పెరుగుతుందని అంచనా వేశారు. ప్రస్తుత వినియోగదారులతో పోలిస్తే ఇది మూడు రెట్లు పెరిగి దాదాపు 98 కోట్ల మందికి చేరుకుంటుందని పేర్కొన్నారు. మెరుగైన మిడ్-బ్యాండ్ కవరేజ్, టెలికాం కంపెనీలు ఫిక్స్‌డ్ వైర్‌లెస్ యాక్సెస్ పై ఎక్కువ దృష్టి పెట్టడం వల్ల ఈ భారీ వృద్ధి కనిపిస్తోంది. మరోవైపు, ఇదే కాలంలో 4G యూజర్ల సంఖ్య 60 శాతం మేర తగ్గుతుందని కూడా అంచనా వేస్తున్నారు. ఒకవేళ అలా జరిగితే, 4G యూజర్ల సంఖ్య సుమారు 230 మిలియన్లకు పడిపోతుంది.

Read Also:Dry Fruits: ఉదయం ఏ డ్రైఫ్రూట్స్ తీసుకుంటే ఆరోగ్యానికి మంచిదో తెలుసా?

గత ఏడాది చివరి నాటికి, భారతదేశంలో మిడ్-బ్యాండ్ 5G కవరేజ్ ఇప్పటికే 95 శాతం మంది ప్రజలకు చేరుకుంది. భారతదేశంలో 5G ఇంత వేగంగా వృద్ధి చెందడానికి కొన్ని కారణాలు ఉన్నాయి. ఇతర దేశాలతో పోలిస్తే భారతదేశంలో ఇంటర్నెట్ డేటా ధరలు చాలా తక్కువ. గ్రామీణ ప్రాంతాల్లో కూడా హై-స్పీడ్ ఇంటర్నెట్ కోసం డిమాండ్ విపరీతంగా పెరిగింది. ఈ కారణంగానే ఇంటర్నెట్ అంతమందికి చేరువ అయింది.

ప్రపంచవ్యాప్తంగా కూడా, మొబైల్ డేటా ట్రాఫిక్ ఏడాదికి 19 శాతం చొప్పున పెరుగుతోంది. 2030 నాటికి ఇది రెట్టింపు కంటే ఎక్కువగా అవుతుందని అంచనా వేస్తున్నారు. భారతదేశం ఈ డిజిటల్ విప్లవంలో ముందుండి నడిపిస్తుందని ఈ నివేదికలు స్పష్టం చేస్తున్నాయి.

Read Also:Viral Video: ఏదేమైనా ఈ బామ్మ సూపర్బ్.. 80ఏళ్లలో ట్రాక్టర్ జోరుగా నడిపి అదరగొట్టింది